حل مشكلة وجود اكتر من خط متسجل ببطاقتك ومش بتوعك:
١- في البداية حمل برنامج الجهاز القومي لتنظيم الاتصالات My NTRA من اللينك اضغط هنا
٢- لو لقيت خطوط غير خطوطك متسجلة ببطاقتك او حتي ملقيتش روح كل شركات المحمول وقوللهم عايز اعرف الخطوط المتسجلة ببطاقتي وتديهم بطاقتك .. ولازم في كل الحلات تروح تتاكد من شركات المحمول من الخطوط المتسجلة ببطاقتك لان البرنامج بيجيب بس الخطوط المتسجلة ببطاقتك الشغالة حاليا اما لو كان فيه خطوط واتقفلت حاليا فمش هتظهر في البرنامج لكن برضه ممكن بعدها بسنين يطلع عليك مسئولية مالية او حتي جنائية لا قدر الله بسبب خطوط كانت ببطاقتك زمان ومقفولة حاليا
٣- لو ظهر خطوط تانية غير خطك اطلب منهم معرفة الارقام دي وامتي اشتغلت وفين وهل مازالت شغالة حاليا ولا اتوقفت .. ولو حد رفض اي طلب منهم اطلب مقابلة المدير وقولله يعني انتو مسجلين الارقام دي ببطاقتي وبدون اذني حتي وجايين تقولولي مينفعش اعرف بياناتهم وساعتها اطلب منهم عمل شكوي في الموظفين اللي سجلو الخطوط دي وفي الشركة بالتالي لانهم خدو رقم بطاقتك وسجلو بيه اي خطوط وقوللهم انا عايز اعرف ازاي الخطوط دي اتسجلت ببطاقتي رغم اني عمري مروحت مكان شرا الخطوط دي وخد رقم الشكوي
٤- خلاص انت عرفت الارقام اللي مش بتاعتك اكتبهم عندك واطلب عمل شكوي انكار ملكية ودي فيها بتنكر ملكيتك للخطوط دي خالص وبالتالي انت مش متحمل اي مسئولية عنهم وعايز تقفلهم وحتي لو كانت الخطوط دي موقوفة حاليا قوللهم برضه انك عايز تعمل شكوي انكار ملكية منعا لاي مسئولية تطلع عن الخطوط دي ايام ماكانو شغالين .. ولو حد طلب منك عمل طلب اغلاق الخطوط دي اوعي ترضي لان الطلب ده معناه اقرار منك ان الخطوط دي بتاعتك وانك متحمل المسئولية عنهم وانك بس عايز تقفلهم بعكس شكوي انكار الملكية اللي مش بيبقي عليك اي مسئولية عن الخطوط دي .. واي نموذج تاخده اقراه واتاكد انه بيقول انك مش مسئول عن الخطوط دي ولو كان غير كده متمضيش وبرضه خد رقم الشكوي
٥- المفروض خلال يومين هيتابعو معاك حل الشكوتين دول وهياكدولك ان الخطوط دي اتقفلت وساعتها جرب رن عليهم واتاكد انهم اتقفلو وادخل تاني علي برنامج جهاز تنظيم الاتصالات وراجع عدد الخطوط المتسجلة ببطاقتك والمفروض ساعتها مش هيفضل غير خطوطك
٦- بعد ميخلص اليومين وسواء اتحلت الشكاوي دي او حتي متحلتش (منعا لحصول مشكلتك مع اي حد تاني) اتصل بجهاز تنظيم الاتصالات ١٥٥ او من البرنامج اطلب عمل شكوي وقوللهم مشكلتك وقوللهم رقم الشكوي اللي كنت عاملها في شركة المحمول وهيتابعو معاك حلها خلال ٥ ايام .. وبس كده
ملحوظة:
طبعا لازم تكونو عارفين ان خطوط الشركات مش بتكون متسجلة باسم صاحبها لكن باسم المفوض وبالتالي مش هيكون متسجل ببطاقتك في البرنامج
ناس كتير بتقول انها راحت الفرع وطلبت عمل شكوي انكار ملكية لقيو الموظف ميعرفش عنها حاجة وحتي المدير ميعرفش .. وزي مقلت انكم الاحسن تروحو فرع كبير علشان يبقي احتمال كبير ان الموظفين قابلو المشكلة دي وكمان لازم تكونو عارفين ان انكار الملكية ده معناه ان الشركة بتاخد ارقام بطايق اي حد وتحطها علي اي خط وخلاص يعني مش بتحافظ علي سرية العملاء وكمان المفروض بيتحاسب الموظف اللي تم شرا الخط من عنده وكمان بالتالي الموضوع غالبا بيوصل لجهاز تنظيم الاتصالات وبالتالي الموظفين مش بيكونو عايزين يعملو مشاكل لزمايلهم ولا للشركة وعلشان كده كتير لما بنروحلهم بيقولو انهم ميعرفوش حاجة اسمها انكار ملكية واللي يعرفه هو طلب اغلاق الخط وبيبقي عايزك تمضي عليه وده لان معناه ان انت بتقول ان دي خطوطك وانك عايز تقفلهم وانك متحمل اي مسئولية عنهم وبالتالي بتشيل اي مسئولية عن الشركة والموظفين في تسريب بيانات العملاء وطبعا زي مقلت وباكد طالما لقيت خطوط مش بتاعتك اوعي تمضي علي طلب اغلاق الخط لانك لو قريته هتلاقي تحملك للمسئولية عنهم
وبالنسبة للناس اللي بتقول "سيب اللي معاه خط متسجل باسمي ايه المشكلة" او "ده شكله راجل محترم اسيبله الخط وخلاص" او "لما كلمت الراجل قاللي انه محتاج الخط وصعب عليا" .. لازم يا جماعة تكونو عارفين ان لو حصل والشخص ده كان عليه فلوس او فاتورة ساعتها هيرجعو علي اللي متسجل الخط ببطاقته والاسوا بقي لو حصلت مصيبة او جريمة في مكان ولقيو موبايل وفيه خط متسجل باسم واحد يا تري هيجيبو مين من قفاه وطبعا محدش هيقف جنبك وكله هينكر انه ليه علاقة بالموضوع .. الاسئلة دي هتخليكم تقفلو الخطوط بدون محد يصعب عليك
وبرضه علشان نكون جبنا كل وجهات النظر فلو كان معاك خط مدة طويلة وروحت وعرفت انه مش متسجل باسمك تعمل ايه منعا لاي حد انه يقفل خطك في المستقبل وعلشان تكون ماشي صح .. يستحسن تروح فرع كبير وتعرف منه بالظبط ايه المطلوب واللي سمعته من ناس كتير (ومش متاكد منه) هو انكم بتشحنو ٣ كروت بحد ادني كروت ١٠ جنيه وتحتفظو بالكروت دي وبعد شهر تروحو الفرع بالكروت وتقولولهم انكم عايزين تنقلو الخط باسمكم والدليل هو الكروت دي اللي شحنتها يوم كذا وتقوللهم اسم كام واحد من اللي كلمتهم كتير الشهر ده، او تخلي اللي الخط باسمه يعمللك تنازل
وياريت كل واحد يخلي المتسجل باسمه هو خطوطه بس لا اكتر ولا اقل علشان محدش يشيل مسئولية غيره .. وده بعيدا عن خطوط الشركات اللي زي مقلت بتكون باسم المفوض ومفيش مشكلة في ده
ناس كتير سالت ايه سبب اللخبطة دي وان كل واحد بيلاقي خطوط كتير باسمه مش بتاعته ولا عمره راح مكان شراها .. وغالبا السبب هو انه لحد من كام سنة كانت الخطوط بتتباع عالعربيات وفي المترو بدون اي ورق وبعدها غالبا طلع الزام بتسجل كل الخطوط في كل الشركات فالشركات لانها مش قادرة توصل لبيانات الناس اللي باعتلهم الخطوط بالطريقة دي قامو واخدين اي ارقام قومية مسجلة عندهم وحطوها علي اي خطوط وعلشان كده عادي انك تلاقي خطوط مش بتاعتك متسجلة باسمك في الشركة اللي فيها الخط بتاعك .. لكن الغريب اننا بنلاقي خطوط ببطاقتنا في شركات معندناش خطوط فيها خالص وده بيخلي الواحد يسال هي السركات دي جابت رقم بكاقتي منين وهل الشركات بتدي لبعض بيانات العملاء وارقام بطايقهم .. معرفش
وعموما لازم تبقو عارفين ان احتمال حصول مشاكل بسبب خط مش باسمك هو احتمال قليل لكن لما بتلاقي خطوط كتير مش بتاعتك متسجلة باسمك فده بيزود احتمال حصول مشكلة من اي خط فيهم
خدت بالي ان ان ناس كتير خايفة جدا من وجود خطوط مش بتاعتها باسمها وان الدنيا مش مستاهلة الزيطة دي كلها .. وانا شخصيا رغم اني اللي كاتب البوست لكني شايف الموضوع مش كبير قوي زي ما اغلب الناس خايفة وزي مقلت ان احتمال حصول مشكلة بسبب ده هو احتمال قليل لكن الاحتمال ده بيزيد خصوصا لو عرفت ان فيه خطوط كتيرة مش بتاعتك وممكن ناس يحكولكم عن ايام زمان لما كان شخص واحد بياخد كمية خطوط من الشركة وبعدها يبيعهم لكن بيفضلو باسمه وممكن بعدها بسنين يتفاجئ ان عليه كمية مطالبات وقضايا بسبب عدم سداد فواتير الخطوط دي او قضية اتجاب فيها الخط ده رغم انه ميعرفش اي حاجة عنها .. فاحنا بنعمل اللي علينا علشان نمنع احتمال حصول مشكلة بسبب خط باسمي مع حد معرفوش
لما شفت ناس كتير جدا بيشتكو من نفس المشكلة بدات احس ان نسبة كبيرة من الخطوط متسجلة باسماء اي حد سواء في الشركة او مش فيها اساسا واظن ان لو عدد كبير عملو انكار الملكية للخطوط دي في فترة مش طويلة فغالبا الشركة هتحصللها مشاكل كتيرة من جهاز تنظيم الاتصالات وطبعا الشركات يستاهلو كل اللي يحصللهم بسبب ده وعلشان كده غالبا الشركة قالت تعليمات للموظفين بحيث لما حد يروح فرع يقوللهم عايز ينكر ملكية خطوط فيعملو نفسهم مش فاهمين او يقولو مفيش حاجة اسمها كده اساسا او حتي يحاولو يضحكو عالناس ويمضوهم علي طلب اغلاق الخطوط وده لانه بيشيل اي مسئولية عن الشركة وبيشيل العميل كل المسئولية
الشركات كانت بتنفي ان فيه اصلا حاجة اسمها انكار ملكية لكن بعد الضغط عليهم لقيتهم بيطلعو النموذج من الدرج عادي جدا وده خلي كتير من الناس يحسو ان الشركات بتستعبطهم وبالتالي بقينا مصرين علي اخلاء مسئوليتنا من الخطوط دي لاننا مبقيناش واثقين في الشركات دي ومش مستبعدين انه لو حصلت مشكلة لينا بسبب الخطوط دي ان الشركات تقول مليش دعوة رغم ان الغلط من عندهم بسبب الديلرز اللي كانو بيبيعو الخطوط بدون اي اثبات
تعليقات
إرسال تعليق